Պլանտար ֆասցիիտ և կրունկի ցավ
Առավոտյան առաջին քայլերի ժամանակ ուժեղ կրունկի ցավը, երկար քայլելուց կամ կանգնելուց հետո կրկնվող ցավը հաճախ հանդիպում են պլանտար ֆասցիիտի դեպքում։
Ի՞նչ է պլանտար ֆասցիիտը
Պլանտար ֆասցիան հաստ հյուսվածքային կառուցվածք է, որը գտնվում է ոտնաթաթի ստորին հատվածում և մասնակցում է ոտնաթաթի կամարի պահպանմանը։
Երբ այս հատվածը ենթարկվում է կրկնվող կամ ավելացած ծանրաբեռնվածության, կարող է առաջանալ կրունկի ստորին հատվածի ցավ։ Այն հաճախ առավել արտահայտված է լինում առավոտյան կամ երկարատև հանգստից հետո առաջին քայլերի ժամանակ։
Երբ ցավը կարող է նման լինել պլանտար ֆասցիիտի
Կրունկի ստորին կամ ներքին հատվածի ցավ։
Առավոտյան առաջին քայլերի ժամանակ արտահայտված ցավ։
Երկար նստելուց կամ հանգստից հետո վեր կենալիս ցավի ուժեղացում։
Երկար քայլելու, կանգնելու կամ վազելուց հետո ցավի վերադարձ։
Ոտնաթաթի տակ ձգվածության կամ լարվածության զգացում։
Երբեմն ցավը սկզբում նվազում է շարժվելուց հետո, բայց կրկին ուժեղանում է ծանրաբեռնվածության շարունակման դեպքում։
Ինչը կարող է նպաստել ցավի առաջացմանը
Ֆիզիկական ծանրաբեռնվածության կամ քայլքի կտրուկ ավելացում։
Երկար ժամանակ կանգնած աշխատանք կամ երկար քայլք։
Սրունքի և Աքիլեսյան ջլի սահմանափակ ճկունություն։
Անհարմար կամ ոտնաթաթի համար ոչ համապատասխան կոշիկ։
Ոտնաթաթի մեխանիկայի առանձնահատկություններ։
Մարմնի քաշի ավելացումը որոշ մարդկանց մոտ կարող է բարձրացնել ոտնաթաթի վրա ծանրաբեռնվածությունը։
Ռենտգենում կրունկային շպորայի առկայությունը ինքնուրույն չի նշանակում, որ հենց այն է ցավի պատճառը։ Շպորա կարող է հայտնաբերվել նաև առանց որևէ ցավի, իսկ պլանտար ֆասցիիտ կարող է լինել առանց տեսանելի շպորայի։
Կրունկի ցավը միշտ չէ, որ պլանտար ֆասցիիտ է
Նմանատիպ ցավ կարող է հանդիպել նաև Աքիլեսյան ջլի խնդիրների, նյարդի սեղմման, կրունկի ճարպային բարձիկի խնդիրների, սթրեսային կոտրվածքի կամ այլ վիճակների դեպքում։
Այդ պատճառով միայն ցավի տեղակայմամբ կամ ռենտգեն պատկերով ճիշտ ախտորոշում հաստատել հնարավոր չէ։
Շատ դեպքերում ախտորոշումը հնարավոր է կլինիկական զննմամբ։ Ուլտրաձայնային, ռենտգեն կամ ՄՌՏ հետազոտություն կարող է անհրաժեշտ լինել, եթե ցավը երկարատև է, ախտանիշները ոչ բնորոշ են կամ կասկածվում է այլ պատճառ։
Նմանատիպ ախտանիշները դեռ չեն նշանակում նույն ախտորոշումը։
Նկարագրված ախտանիշները կարող են համընկնել ձեր գանգատների հետ, սակայն դրանք ինքնուրույն չեն հաստատում ախտորոշումը։ Ցավի հստակ պատճառը հասկանալու և համապատասխան բուժման տարբերակը ընտրելու համար անհրաժեշտ է մասնագետի անհատական խորհրդատվություն։
Ձեր ախտանիշները նման են նկարագրվածին՞
Կրունկի ցավի պատճառը կարող է տարբեր լինել նույնիսկ նմանատիպ ախտանիշների դեպքում։ Հստակ գնահատման և բուժման տարբերակների քննարկման համար համեցեք մասնագետի խորհրդատվության։